شنت الإعلامية ياسمين عز هجوماً على الفنانة الشابة مايان السيد عبر برنامجها كلام الناس الذي يعرض على قناة mbc مصر، نتيجة لردها على سؤال صحفي ذكر اسم ياسمين عز برأئها في أفكارها، لترد الأخيرة «لا تعليق مش هساعدها تتشهر أكتر».
لترد الإعلامية ياسمين عز من خلال برنامجها كلام الناس قائلة: «في مثل أنا بعمل بيه، وهو من دق الباب لقي الجواب، يعني اللي يخبط على حد هيلاقي رد، من وجهة نظري الرد 3 أنواع، رد بالتجاهل، ورد بقلة الأدب، ورد بالأدب».
وأضافت ياسمين عز: «لما تكوني لسه مبتدأه في بداية حياتك المهنية، ولسه بيكتبوا اسمك بالقلم الرصاص، حاولي متخوضيش معارك مجانية، متخلقيش لنفسك أعداء بدون داعي وببلاش، مش ذنبي إن الصحفي ملقاش عندك تاريخ أو حاجة مهمة يسألك عنها فسألك عني، بدل ما تكلمي عني، كنت طلبتي بكل احترام وتهذيب إن الناس تسألك عنك إنتي وعن شغلك إنتي».
وتابعت ياسمين عز: «انتي بنت ظريفة، حاولي إنك تشتغلي على نفسك أكتر وتعملي أدوار مهمة وتصنعي تاريخ مهم تخلي الصحافة المرة الجاية تسألك عنك مش عني أنا، إحنا مش ملزمين إننا نحب بعض بس مجبورين نحترم بعض، احمدي ربنا إنه وقعك فيا المرة دي، أنا نادرًا لما برد، مرة تانية ممكن تقعي مع حد تاني يستلمك ليل نهار مش هتخلصي منه، وتأكدي إن الإنسان لازم يشتغل بجد عشان يكون مهم، ولما يكون مهم هيسألوه عن نفسه هو مش ناس تانيين».